كيف اثبت ان اخوي سفيه ؟

[سعيدان]

صبحكم الله بالخير
عندي اخ عمره 32 سنة مجننا ياناس
نصاب وكذاب وجاب لنا المشاكل
يمشي ويتدين ويتسلف وياخذ قروض من محلات تمويل والرجال مجنون اهم شئ يوصل للفلوس
تخيلوا ممكن ياخذ من شخص 10 الاف علشان يسافر او ينبسط فيها ويكتب على نفسه شيك او سند او كمبيالة بان في ذمته 50 الف

احنا عايلة محترمة وكلنا ندور الستر لكن هالولد جاب لنا الفضايح والمشاكل
زوجناه علشان يعقل وللاسف ورط زوجته وفتح باسمها مؤسسات وطلع شيكات على هالمسكينة وياخذ ديون وينصب وصارت ضده عشرات الشكاوي في التنفيذ والمحاكم
وزوجته ضدها شكاوي ومطالبات بسببه

اخر مرة رحت للتنفيذ حصلت واحد اعرفه كان بحارتنا طفران فقران ومعه سند ضد اخوي بمبلغ 100 الف
قلت له ياصالح انت ماعندك قيمة بنزين سيارة من وين عطيت اخوي 100 الف ؟ وتركني ومشى
الي اكتشفته انه سلف اخوي 11 الف واخذ منه سند موقع على بياض وكتب 100 الف


واحد ثاني لقيته يطالب اخوي مليون و 200 الف
قلت له حق ايش ؟ قال اخوك يعرف
قلت له تحلف بالله انك عطيته هالمبلغ ؟ قال لا مااحلف انا معي شيكات


واحد مطلع على اخوي صك بمبلغ 200 الف
وجالس ادوره اشوف وش مقابل الصك ويتهرب مني ويرسل لي يقول راجع التنفيذ

واحد رفع شكوى شيك بمبلغ 500 الف على اخوي وعنده مكتب صغير كنه جحر ضب يعطي بطاقات سوا والله اعرفه راس ماله مايوصل 100 الف
ويدعي انه اعطى اخوي نص مليون طبعا توقيع اخوي وباقي البيانات خطه هو
قلت ابختبره ورحت رفعت دعوى استرداد سند ضده في المحكمة العامة وقلت له تعال اثبت قيمتها وكيف اعطيته ووش اثبات التسليم وخاف وماحضر الجلسة وراح لاخوي من وراي وسوا معه صلح ومهلة وخلى اخوي يتنازل عن القضية من وراي



كل الي مقدمين عليه ناس اهل ربا ونصابين ويبغون فلوس
واخوي عليه اوامر قبض وتعميمات بالهبل
وش اسوي تعبت ياناس
والله امراض جاتني بسببه ضغط وسكر وشعري صار ابيض وانا رجال ساتر عمري وعايلتي ولاعمر احد طق بابنا


كيف اقدر اخلي هالنصابين الي معه شيكات والي معه سندات والي معه صك كيف اقدر اخليهم يثبتوها
كيف اثبت ان هذا سفيه يمشي وياخذ الالف ريال ويكتب على نفسه 100 الف

ارجوكم دلوني وساعدوني

[ابو محمد 2]

هل عندك وكالة من أخيك للمطالبة والمدافعة ومراجعة جميع جهات الاختصاص؟

[سعيدان]

نعم عندي وكالة منه للمحاكم فيها كل الاختصاصات من مدافعة ومرافعة وكل شي