تعرضت لخداع من صاحب عقار ارجو مساعدتي

[cbc100]

السلام عليكم ورحمه الله وبركاته
ياليت يااخوان توجهوني للحل الناسب لمشكلتي

انا ساكن في عمارة صغيرة
هذه العمارة اول من استاجرها هو ابوي بعقد من مكتب قبل 13 سنة
كان ايجار العمارة كاملة 32 الف ريال
شقتين وملحق صغير في السطح
ابوي كان متزوج ثنتين وساكن بشقتين وملحق السطح كان مخليه لاخوي الي في الجامعة عازب
بعدها ابوي كلم صاحب العمارة وقال له ينقص في الايجار ونزلها الى 25 الف يعني كل شقة 10 الاف و 5 الاف لملحق السطح
استمر ابوي حوالي 8 سنوات في العمارة
بعدها قال لي : انا بطلع لانه حصل بيت اكبروقال : وش رايك انت واخوك تسكنون فيها ؟
جينا انا واخوي وكل واحد اخذ شقة بسعر 10 الاف
اما الملحق كان فاضي لان اخوي الي في الجامعة تخرج وتوظف في مدينة ثانية
استمريت انا واخوي نسدد الايجارات لمدة 5 سنوات 10 الاف لكل شقة ( طبعا اخبرنا صاحب العمارة ان الملحق فاضي وغير مستفاد منه )
المهم قبل شهرين اخوي غادر الشقة لانه حصل شقة اكبر واحدث بنفس السعر
بقيت انا في العمارة
عرضت عليه انه يعطيني شقة اخوي وينزل في سعرها او يعطيني العمارة كاملة بسعر رخيص
وافق واتفقنا على سعر كامل للعمارة 18 الف بحكم ان الايجارات نزلت وكل العماير فاضية حولي
وطلبت من صاحب العمارة انه يعدل على شقة اخوي لان فيها بعض الامور تحتاج تغيير
يعني بلاط قديم وتحتاج بوية وهي اصلا عمارة قديمة وترميمها كان زفت
قال لي : انا ماعندي فلوس لكن انت صلح كل شئ ورجعها جديد وبذوقك وراح نخصمها من الايجار الجديد
وفعلا
بديت اشتغل له وكان البيت لي
العمال اجيبهم واكاسرهم باقل الاسعار
وشريت كل المواد والبويا والبلاط والسباكة وكل شئ اخذ فاتورة عليه وباقل اسعار في السوق
لدرجة اهملت شغلي على حساب الترميم
المهم وصلت التكلفة حوالي 15 الف ريال فواتير مواد 11 الف واجور عمال 4 الاف
كلمني بعدها قال لي حاول تغير بويا العمارة الخارجية
قلت له حاضر واشترط علي نوع غالي
ورحت ضبطتها بما يكلف 3 الاف ريال بمعرفته
انا هنا قلت مو مشكلة كل التكلفة صارت 18 يعني قيمة ايجار سنة
اتصل عليه حوالي اسبوع مايرد
وانا باقي في ايجاري القديم مدة شهر
امس اتفاجا فيه شخص جاي يدق الباب يقول لي انه اشترى العمارة
قلت له الف مبروك
قال لي ان صاحب العمارة يقول اجارك انتهى
قلت لا اجاري القديم بينتهي بعد شهر ومتفقين على سنة جديدة
قال المشتري باقي لك شهر مو مشكلة
لكن ايجار جديد انا المالك تبي تستاجر استاجر مني وطلب مني عقد
قلت له انا مرمم العمارة على حسابي على اساس اسكن سنة
قال وين عقدك ؟
قلت ماكتبناه باقي
قال الله يستر عليك نهاية الشهر تطلع برا العمارة او اذا حبيت انا باجر ك شقة بسعر 12 الف

بالله ياناس وش رايكم ؟
صاحب العمارة خلاني ارمم له الشقة كاملة والعمارة من الخارج ودفعت 18 الف ريال واخر شئ باعها

اليوم قدرت اوصل لصاحب العمارة وقال لي خلاص بعتها قلت له وفلوسي الي خسرتها 18 الف
قال ابوك ايام ماكان ساكن مااعطاني حق الملحق الي في السطح لمدة 3 سنوات وانتوا جيتوا سكنتوا انت واخوك ومااحد اعطاني قيمة الملحق واعتبرها مقابله
قلت له : الملحق كان فاضي وانت عارف
قال مو شغلي

انا افكر اشتكيه في المحكمة بقيمة الترميمات وعندي فواتير وشهود العمال الي اشتغلوا ودفعت لهم قيمة شغلهم
مع العلم ان مافيه عقد بيننا الا عقد اول ماسكن ابوي قبل حوالي 13 سنة ومدته سنة فقط
بعدها كنا نتعامل معه بشكل ثقة بدون عقد وايجاراته يجي يستلمها كاش
الا انا اخر 3 سنوات كنت احول ايجاري واجار اخوي بحسابه البنكي
وهو سبق وقلت له الملحق فاضي وعنده خبر لكن الرجال متلاعب
ارجوكم وش الحل معاه ؟

[عرفات تركى]

عقد ايجارك مع المالك القديم ساري طالما اتفقت على سنه جديد البيع لا يفسخ عقدك مع القديم طالما متفق معها على عام جديد
والمبالغ اللي صرفتها يسال عنها الا اذا كانت قيمة الاجرة
بلغ المالك الجديد انك مستاجرة ودافع الاجرة وعليه التوجه للمحكمة في المحكمة ادخل المالك القديم ويتم اخذ الايجاب الشرعي في مواجهته على الاتفاق معه
لا تخرج من العمارة

[من واقع تجربة]

ارفع دعوى مطالبة مالية في المحكمة العامة ضد المالك القديم بدفع المبالغ وقدم مايثبت وشهودك وفي الاخير بيحلفه القاضي اليمين ولا تتردد

[konoz]

صاحب العمارة الجديد : كلامه واضح اما تسوي عقد جديد معه او تطلع
صاحب العمارة القديم : ماعندك عليه مستمسك ( لاعقد اجار ولاأتفاقية على الترميم )
عقد الايجار: مع أبوك ومدته سنة .
أنت الان موقفك ضعيف لاعندك عقد ولاأتفاقية عمل فعلى ماذا وبماذا تقدم عليه بالمحكمة , وفقكم الله .